पुणे, 23 मे: सध्या राज्यात लॉकडाऊन आहे. राज्यातील कोरोनाला रोखण्यासाठी राज्य सरकारनं लॉकडाऊन जाहीर केला. लॉकडाऊनच्या काळात राज्य सरकारनं काही निर्बंध घातले आहेत. बऱ्याचंदा सरकारनं दिलेल्या नियमांचं अनेक ठिकाणी उल्लंघन होताना पाहिलं आहे. अनेक नागरिक नियमांचं वारंवार उल्लंघन करत असतात. मात्र पुण्यात कोरोना नियमांचं उल्लंघन करणं एका हॉटेल चालकाला चांगलंच भोवलं आहे. तसंच या हॉटेल चालकावर केलेल्या कारवाईचीही शहरात जोरदार चर्चा आहे. पुण्यातील भवानी पेठेत असलेलं हॉटेल मिलनला चांगलाच फटका बसला आहे. हॉटेलमध्ये चालकानं 40 ते 50 नागरिकांच्या जेवणाची व्यवस्था केल्यानं महापालिकेनं हॉटेल मालकाकडून तब्बल एक लाख रुपयांचा दंड वसूल केला आहे.
लॉकडाऊनच्या काळात राज्य सरकारनं हॉटेल व्यावसायिकांना केवळ पार्सल सेवा देण्याची मुभा दिली आहे. मात्र पुण्यातील भवानी पेठेत असलेल्या मिलन हॉटेलच्या मालकानं नियमांचं उल्लंघन केलं आणि हॉटेलमध्ये 40 ते 50 नागरिकांना प्रवेश दिला. तसंच त्यांच्या जेवणाची व्यवस्थाही हॉटेलमध्ये करण्यात आली होती. याबाबतची माहिती भवानी पेठ क्षेत्रीय कार्यालयाचे सहाय्यक आयुक्त सोमनाथ बनकर यांना मिळाली. त्यानंतर त्यांनी तात्काळ घटनास्थळी जाऊन पाहणी केली. त्यावर बनकर यांनी हॉटेल मालकास कोरोना नियमांचं उल्लंघन केल्याप्रकरणी एक लाख रुपयांचा दंड आकारला आहे. तसंच यापुढे अशी घटना झाल्यास हॉटेल सील करण्यात येईल, अशी समजही हॉटेल मालकाला देण्यात आल्याचं सहाय्यक आयुक्त सोमनाथ बनकर यांनी सांगितलं.
